今次Part 2講到醫生返工係咪同平常人一樣...
我諗大部份醫生都同我係，呢一份係唯一一份打過嘅工。（雖然我都識啲Over-achievers嘅醫生，又有律師牌，又做得飛機師…😰）
不過大部份我哋都淨係做醫生一份工。只不過係打邊間醫院又或者做邊一個Specialty。我哋一畢業就要做實習，實習完就要揀邊一個專科去做Training。嗱， 唔係寸嘴，但係我冇做過第二份工，我答唔到你份工係咪同平常人一樣。
我只能夠以暑期工同埋聽啲唔係做醫生嘅朋友訴苦嘅經驗，諗下做醫生同其他行業有幾大分別。
醫院係一個好講求階級觀念嘅一個體制。我估D人事，例如俾老細捽，俾老Seafood恰，俾大過你嘅同事嗰點去做Extra嘢等等，都會同普通嘅工一樣。
同事一樣有八婆/有虛偽/有擺到明Sin你一鑊/有袖手旁觀食花生/有攞盡着數例如淨係返醫院先叉電Or全屋啲筆都係攞醫院啲藥廠筆等等/少數有正常傾得心事嘅樣樣都齊。
我舉幾個例，咁可能你哋會有啲共鳴之處：
1. 個陣每個禮拜三都要（被逼）同老細開會加飲茶。做最細嗰陣就要負責叫點心。叫得少又話你，叫得太多又逼你食晒佢（因為係你叫架嘛）。 最終研發左我哋Team嘅獨有方程式：如果嗰日齊人嘅，因為有多個（肥）男上司/同事，就要嗌（2N）個點心。如果少啲男同事嘅話就要嗌（2N -3）個點心。當然全檯人斟茶斟水梗係我。我到今日都好鬼憎食點心。所以我係唔會陪我呀媽去飲茶。
2. 永遠有寫唔完嘅report。寫完嘅時候有懶叻上司幫你睇/為改而改。但係我最憎就係佢改我啲英文。因為佢英文💩過我。仲要我最憎嘅就係佢改完一次之後會再改返轉頭。改返轉頭嗰個版本就其實係我原本寫嘅Version。但係你又唔串得佢。
3. 我哋都有射波嘅同事。唔係醫生個個都有正義感🤣。醫院係極少會炒人，所以有啲喺度Hae做，R腳趾，等退休。面皮非常之厚，你照佢幾多次肺，佢都唔會理你。
例如禮拜二某個老Seafood係全日都要睇門診。唔知點解佢請病假永遠都係禮拜二咁囉。病人約咗複診係唔會因為佢病咗就唔黎架嘛。佢哋冇藥食你就要搵個人去睇佢地，開藥俾佢地。Seafood D 症咪會平均分俾其他人。而我就係咁好彩同佢係同一日睇門診， 大大話話都哽過唔少佢啲💩。有一次佢病咗，第二日返嚟佢電攣左頭髮，而佢係一個老嘅男醫生。可能佢之前發高燒掛😏
4. 試過同老細開會之前，大過我少少嘅同事好真心咁教我陣間要點樣Present Case，提我點避重就輕。想當年冇知嘅我戇🐶🐶真係照住佢教我咁樣講。我同事就當住老細面前話我咁樣講唔啱，其實就係應該係咁咁咁咁先啱。佢就係老細面前叻叻🐽囉。我就𤓓到爆。開完會我同事又好似冇嘢發生過咁，叫我同佢一齊落去Canteen食飯。超級公私分明，佢真係叻。你唔好理，佢一Fellow就即刻升咗做AC。
我諗呢啲大家都應該有過經歷過類似嘅嘢。所以醫院都幾黑暗哈哈。咁樣樣大家會唔會覺得做醫生親切啲呢？
好啦又待續😅
-------
瘋狂食好西2
終於可以去食蟹嘅Buffet。不過不失啦D嘢。
另外張相就係：
清真爆汁燙死我牛肉餅
我阿媽唔俾我食晒成包嘅炸蝦片
出前一丁麻油公仔麵
食咗屙到我七彩嘅三文魚魚生+冇影相嘅海膽吞拿魚海鮮丼
又係Lemon Meringue Tart
Beef Taco
超級正食咗好鬼多年海南雞飯
泰式黑椒炒蟹
蓮子百合💩餅
-----
承蒙大家嘅厚愛，我收到太多你哋嘅PM啦～～～～但係今日開始個PM功能會關掉。實在太多人問我有冇子宮頸癌針。我都話幫老細打工，啲錢唔係我袋落袋，我唔會幫佢搵生意哈哈～～同埋啲針我哋全部留晒俾人，你哋唔使諗啦。唔使驚架，藥廠為咗賺錢會好快有新貨，等多陣啦！
另外都講聲， 大家太睇得起我啦。佢哋問我啲醫療問題，其實我好難俾意見架。始終我冇面對面見過你地，冇詳細問診過，冇幫你地做過檢查，我都真係唔Comfortable同唔方便講啲乜嘢，請見諒。你覺得可以淨係傾計咁，但係我都要帶返個頭盔。呢一個平台唔係一個我比醫療意見嘅地方。有咩事大家佢問番你哋自己嘅醫生，知冇？
同埋唔好問我私人問題，幾時畢業，喺邊度開診所！都我唔好黎搵我，我唔要做嘢呀！哈哈哈哈哈哈！俾番啲神秘感我！😎😎😎
🙏🏻🙏🏻🙇🏼🙇🏼
Search